No i stało sie. Po wielu latach istnienia naszego serwisu przekroczomy granice i wyłażymy ausen. Łod tego sezonu wstawiomy do naszych stronek niymiecko bundesliga, ta prawdziwo, co pokazujom w Eurosporcie. My tu na Ślonsku łoprócz naszych szpilów czynsto o Bundeslidze godomy, wystarczy sie przejść na piyrszy lepszy mecz i jak sie już obgodo wszystkie LZS-y, to pryndzyj czy później schodzi na niymiecko liga i ciyngiym słychać jak tam Borussia, jak Bayern i jak Schalke.

Ślonskie kibice żyjom nie ino B-klasom czy okryngówkom, ale jako żywo interesujom sie Bundesligom. Mogymy pedzieć, że tu, na Ślonsku Bundesliga je traktowano jakby to boła nasza polsko liga, a że łod jakiygoś czasu granic już niy ma, to ta różnica traci sie jeszcze bardziyj. Bez toż tyż łod tego sezonu bydymy pisać wyniki Bundesligi, coby pod rynkom mieć świyżo tabela, bo wiymy, że interesujecie sie tom ligom i chcecie ło niyj czytać.

Jak nom to wyjdzie, nie wiadomo. Na razie zaczynomy łod terminarza i tabeli, a co bydzie, zoboczymy. Łobejrzymy, jak czynsto byndziecie na ta liga zaglondać, jak dużo bydziecie na niyj pisać, eli bydzie srogie zainteresowanie abo niy. Ale przi okazji chcymy wom pedzieć, że ta stronka je do zagospodarowanio przez wos. Wiymy, że o Bundeslidze dużo wiycie, że dużo o niyj godocie, że na tymacie sie znocie. Tu pod tabelom mogom sie znoleźć wasze wpisy, mogecie sami ta liga poprowadzić. Jak sie wto z wos tym żywo interesuje, mo coś do pedzynio i chce to pedzieć inkszym, to może tu tyż pisać. Jak mu pasuje, moge pisać po ślonsku, jak niy, to może być także po polsku, a nawet może być Deutsch. Jeśli chcesz pisać o Bundeslidze ślonskim kibicom, jeśli chcesz ze swoimi tekstami dotrzeć do tysiyncy opolskich kibiców, to drzwi stojom łotworym... mogesz tu zostać opiekunem Bundesligi. To je stronka dlo wos i sami mogecie jom redagować. Jeśliby boł wto chyntny abo zainteresowany, to niech do nos napisze. To nic nie kosztuje.