W piyrszyj grupie momo drużyna, co stracioła nojmaniyj bramek, bo ino dwie. Je to Szymiszów i żodno inkszo drużyno niy mo lepszyj obrony. Przinajmniyj na razie. Jedna bramka wiynyj stracone majom Mokre Łany i to tyż je manszaft z piyrszyj grupy. Mokre Łany som przed Szymiszowym, bo majom dwa punty wiyncyj i kupa wiyncyj bramek naszczylanych. Kej jednak godomy o straconych bramkach, to bardzo dobro łobrona mo tyż Kielcza, bo tyż ino trzi stracone. Kielcza je w drugiyj grupie i je w niyj liderym.

Kielcza już downo nie boła w szpicy, a kibice pamiyntajom lata, jak Kielcza grała liga wyżyj (wtedy łostatnio liga się nazywała C-klasa, a Kielcza grała w B). Trudno pedzieć, eli Kielcza zaś idzie na majstra, poczontek sezonu mo jednak dobry. Zaro za Kielczom je Jaryszów - ci to sie nie patyczkujom ino szczylajom wszystkim po równo. 29 bramek niy mo żodno inno drużyna. W trzeciyj grupie na piyrszym placu je Rozkochów - dość sporo przewaga nad drugimi w tabeli Łowkowicoma, aż 6 punktów, dość dużo szczelonych bramek (24) i farońsko dużo, jak na lidera, straconych - aż 10! Łowkowice stracioły ino 4 bramki, ale w tabeli liczom sie punkty, a bramki dopiyro na samym końcu.

W tym sezonie moge awansować wtoroś drużyna z drugiygo miejca. Ze wszystkich grup szczeleckich, kyndzierzyńskich i głubczyckich awansujom dwie drużyny z drugiygo miejsca, ale jak na razie, nie wiadomo wtore, bo jeszcze tego nie zdonżyli ustalić. Wiadomo je jednak, że jak wto nie bydzie już mioł szansy na majstra, to zawsze może grać o drugi plac, bo z niego tyż może sie dać awansować.